Kveðja

Jæja, gott fólk. Þá er nú komið að þessu: seinasta bloggið. Þar sem síðan heitir G & R Do Danmark, ætli maður láti þá ekki staðar numið nú þegar maður er fluttur úr Danaveldi. Að öllum líkindum a.m.k., það er aldrei að vita hvenær bloggandinn kemur yfir mann, og hver veit nema maður stofni bara nýja bloggsíðu. Hvað með Gunnar og Ragnheiður Do Iceland ;) ?

Ég ætla að láta vera með að gerast hádramatískur og telja upp alla eftirminnilega og þroskandi viðburði eða nefna alla þá vini sem við höfum kynnst seinustu þrjú árin. Ef þið viljið fá góð skil á öllu því, að þá er bara að grafa eftir eldri bloggpóstum og finna út úr því sjálf :) Læt mér nægja að segja að þetta hefur bara verið alveg æðislegur tími!

Nú tekur hins vegar við alveg nýr kafli í lífinu, komin með þessa æðislegu íbúð, komin með mjög góða vinnu, námið búið í bili (eða að klárast). Því segi ég bara eins og Paul nokkur McCartney gerði hérna um árið, "I don´t know why you say goodbye, i say hello"

Ég vona að fólk hafi haft gaman að og jafnvel nokkuð gagn að. Við þökkum við þeim sem hlýddu álesturinn, bæði þeim sem litu stutt við, þeim sem hafa látið sitt eftir liggja í kommentakerfinu og hinum sem hafa fylgt okkur allan tímann.

kv
Gun og Rag

Málaralíf

1. regla hnakkans:

Vertu alltaf med sólgleraugu, sama hvad thú ert ad gera. Thad skemmir heldur ekki fyrir ad vera ber ad ofan.



Ég lenti án efa í vandræðalegasta atviki ævi minnar núna fyrr í dag. Ég var sem sagt nýkominn frá málarabúðinni, hérna dágóðan spotta frá, og var búinn að versla mér allt sem til þurfti til að mála íbúðina vel og vandlega. Málningu, pensla, tape, plast og fleira og fleira. Ég var náttúrulega á hjóli eins og venjulega og sá að til að koma öllum þessum 20 lítrum af málningu heim, mundi ég þurfa að hafa þrjár hendur. Ég náði samt að setja einn 10 lítra dunk á stýrið ásamt öllum pokunum og setti hinn 10 lítra dunkinn á bögglaberann. Þetta gekk voða vel, þetta var 15 mínútna rölt og allt sat fast á sínum stað. Eða þar til ég var næstum kominn heim og átti bara eftir að fara yfir ein ljós. Og það má með sanni segja að ég hafi sett mark mitt á þessi gatnamót, því þegar ég var í þann mund að fara yfir, fer ég yfir litla mishæð, sem veldur því að, já...þið getið rétt ímyndað ykkur. Málningardunkurinn veltur af bögglaberanum og beint á jörðina með miklum dynki, lokið brotnar af og út leka 10 lítrar af hvítri málningu beint á götuna!!!

...anda eða hlæja...

...og halda áfram...

Hmmm....kannski ég hefði átt að setja hina dolluna á hitt stýrishandfangið? Samt fáránlegt að dollan skuli ekki þola meira högg en þetta :)

Oft veltur lítil þúfa þungu hlassi segja sumir, þeir hafa rétt fyrir sér. Ég náttúrulega tók strax pensilinn upp úr og fór að þykjast vera mála göngubrautina, en allt kom fyrir ekki, fólk stóð ásíðis og skellihló. Svo skemmtilega fyrir bareigandann á horninu þá gerðist þetta beint fyrir framan barinn hans og ég var orðinn að þvílíku bíó fyrir fólkið þar inni. Hann hefur ørugglega selt mun fleiri øllara fyrir vikid.

Auðvitað var þetta óborganlega fyndið, mér var bara ekki alveg hlátur í huga þegar þarna var komið við sögu. Ég fór inn á barinn og mætti brosmildum andlitum og mjög hjálpsömum þjóni. Hann útvegadi mér fægiskóflu, stóra fötu og rúllu af pappír. Ég hófst handa og ótrúlegt en satt að þá fór næstum öll málningin aftur ofan í tunnuna. Það er búið að rigna svo mikið (thank god :/) að gatan var alveg tandurhrein. Það verða kannski nokkur korn í málningunni, en ég segi þetta sé bara svona gróf áferð á veggjnum, ef e-r spyr. Restina þurrkaði ég svo upp með pappírnum og setti síðan pappa yfir allt.

Það hefur heyrst talað um að mála bæinnn rauðan, en ég málaði Köben bara hvíta. Þetta var við ljós svo það stoppuðu ófáir bílar/hjóllreiðamenn og sendu mér samúðarbros eða vel valdar háðsglósur og undir lokin var ég farinn að skellihlæja að þessu öllu saman. Ég veit allavegann að ég hef létt undir deginum hjá ansi mörgum, og það ókeypis :)


En svona til ad fyrirbyggja allan misskilning, thá var nú ástæda fyrir sólgleraugunum



E.s. Úr hvada bíómynd er eftirfarandi atridi (nema í stad kústs, thá var notud øxi)?


(ath. atridid er svidsett)

Thetta var líklega seinasta bloggid hér í Danmørku, svo vid segjum bara bless í bili og sjáumst á klakanum.

Gun og Rag

Minimalistísk stemming á Prags B.

Maður lifandi, það var tekið á því í gær! Ég finn bara hvernig harðsperrurnar eru að verða verri og verri. Já, flutningarnir eru yfirstaðnir og gengu þeir bara mjög vel fyrir sig, þrátt fyrir að við vorum bara þrjú. Árni Richard bjargaði okkur fyrir horn og án hans værum við líklega enn að ferma niður. Sem gjöf á móti fékk hann þessa ágætu hreyfingu :) Það má segja að þarna hafi útsölurnar komið í hausinn á okkur, reyndar ekki jafn mikið og í hausinn á Ragnheiði, því hann virtist bara soga til sín alla mögulega lausa hluti.

En eins og sjá má á myndinni er íbúðin frekar tómleg og látlaus. Fullt af tómum snögum á veggjunum (eftir myndir ofl) og því ekkert að gera nema nýta það sem við höfum. Þessi IKEA poki t.d., sem nú þjónar hlutverki óhreinatauskörfu, verður bara að segjast taka sig vel út á vegginum. Að auki komst ég að því að það er meira að segja hægt að nota hann sem körfu þegar henda á óhreinum sokkum í óhreina tauið! Svo það er nóg hægt að gera sér hér til dundurs... ;)



En nú tekur næsta skref við: málningar- og viðhalds aðgerðir. Við ætlum að koma íbúðinni í samt horf aftur, til að fá sem mest borgað af tryggingunni tilbaka. Ég fékk algeran gullmola frá húsverðinum í dag, varðandi hvort mála ætti loftið:

Húsv: hafiði reykt inní íbúðinni?
Ég: Nei.
H: Hafiði haft gesti sem hafa reykt inní íbúðinni?
É: Nei.
H: Hmmm...hafiði eldað heitan mat?
É: Já, að sjálfsögðu!
H: Já, þá þurfið þið að mála! Gufan sko fer út um allt....
É: Hahahaha...

Þetta er nú meiri hálfvitinn :)

SUMARFRÍ Í KÖBEN

Við Gunni erum búin að vera í sumarfríi þessa vikuna. Vei vei og eftir langa rigningartörn já tja líklega seinustu 4 vikur þá kom loksins gott veður og það akkúrat í frívikunni. Snilld og ekkert annað. Við Gunni erum búin að fara á Islandsbrygge og sóla okkur soldið frekar næs
Svo erum við búin að kíkja á útsölurnar sem geta verið ansi magnaðar hér í Danmörku. 'Eg keypti mér 3 kjóla og eitt pils nota bene frekar flottar flíkur á 550 kall danskar og Gunni keypti sér þvílíkt töff jakka á 100 kall sem átti að kosta 1300. Svo erum við búin að kaupa allskonar sniðugt í nýju fínu íbúðina eins og barstóla
Í gær fórum við svo í algjöra menningarferð um Köben ég gaf Gunna sona cph card í sumargjöf hérna í byrjun sumars sem gefur manni ókeipis aðgang á fullt fullt af söfnum á Sjálandi. Við byrjuðum á að fara á Ny Carsberg Glyptotek sem er risa stórt safn með allskonar listaverkum styttum, málverkum allstaðar að úr heiminum. Picasso, van gogh og félagar voru allir með verk þarna. Svo sáum við þessar múmíur frá 300 fkr Því næst fórum við á Dansk design center sem er alltaf með flottar sýningar um danska hönnun núna var það um danska fatahönnun. Svo fórum við á Kunstindusrimuseet sem er allskonar húsgagnahönnun frá bæði kína og evrópu og svo Danmörku að sjálfsögðu alveg ed fyrir mig þar sem maður gat séð fullt af þessum klassísku dönsku húsgögnum eins og þennan hérna
Svo fórum við á arbejdermusseet þar sem við gátum séð hvernig verkalíðurinn í dk lifði í gamla daga. Þvínæst fórum við á Zoologisk museum þar sem við sáum allskonar uppstoppuð dýr allt frá köngulóm uppí ljón. Svaka flott safn. Svo slúttuðum við túrnum á H.C Andersen safninu sem var svona lala en allt í allt mjög fínn dagur.
Svo erum við búin að stússast allskonar því það er nú svo svo margt sem þarf að gera áður en maður flytur svona úr landi. Allskonar leiðinleg pappírsvinna og reddingar hér og þar. Helgin fer svo í að pakka restinni af dótinu okkar því svo förum við með það í gáminn á þriðjudaginn svo það verði komið til Íslands á sama tíma og við svo við getum flutt inn sem fyrst. Later Ragga

Munkalíferni framundan...

...samt ekki eins og þið haldið :) Málið er að hér á Prags Boulevard er undirbúningur fyrir flutning kominn vel á veg og eru 15 kassar þegar orðnir fullir af fötum og öðrum smámunum. Við munum nefninlega flytja dótið okkar út þann 24. júlí og munum því verða án nær allra veraldlegra gæða í eina viku. Aftur á móti mun innbúið koma sadægurs okkur til Íslands. En þessi vika verður notuð til að mála íbúðina og stunda innhverfa íhugun og flest annars en að láta undan tímaþjófum á borð við internets og sjónvarps.

Þetta gæti reyndar skapað smá vandamál í daglegu lífi okkar. Hvað gerum við t.d. varðandi matseld og hjólarferða í vinnuna? Hmmm....það fyrrnefnda verður kannski ekki vandamál...”ég sé fyrir mér töluvert magn af kínamats og pizzaboxum eftir 10 daga”. Við munum einnig halda eftir rúminu okkar, sófanum, einu borði og nokkrum smámunum, sem við ætlum að skilja eftir eða reyna selja. B.t.w. ef e-r vill sófa á 350, eldhúsborð á 250 eða rúm á 600, þá látið vita.

Svo erum við einnig búin að vera dugleg að nýta okkur ákvæðið í tollalögunum um að “fólk búsett í eitt ár eða lengur, má hvert flytja inn nýjar vörur að verði 100.000 kr án þess að borga af því skatt”. Ekki slæmt það og ekki verra að hægt er að það er hægt að fá danska virðisaukann endurborgaðann gegn stimpli frá íslenska tollinum. Við erum því búin að versla okkur m.a. þvottavél ásamt öðru dóti sem er fyrir mun ódýrara hér en heima. Gott ef ég bað ekki um tax free á Mcdonald´s hér um daginn.

Farið er komið!

Jæja, það var mikið að Íslendingar gátu séð sér fært um að aflétta einokuninni á góða veðrinu og leyfa öðrum að njóta veðurblíðunnar :) Hitinn í dag hefur eflaust skriðið uppí 30 stigin og því ágætis byrjun á sumarfríinu okkar!

News update

Ég kíkti aðeins á heimasíðu Sálfræðingafélag Íslands í dag og sá þar óvænta kveðju:

Nýir löggiltir sálfræðingar

Frá Heilbrigðis– og tryggingamálaráðuneytinu komu í gær tilkynningar um að



Sandra Guðlaug Zarif og Gunnar Páll Leifsson



hefðu fengið löggildingu sem sálfræðingar. Til hamingju!

Ég segi bara takk fyrir það!

Ég get að auki upplýst lesendur með því að ég er kominn með starf og mun hefja störf sem á Þjónustumiðstöð Vesturbæjar þann 15. ágúst! Gaman að því. Ég var meira að segja einnig kominn með annað atvinnutilboð og gat því valið á milli. Ágætis tilbreyting frá atvinnuleitinni hérna úti, þar sem ég sendi út á bilinu 50-60 atvinnuumsóknir og fékk boð um að mæta í eitt atvinnuviðtal! Það hreystir mann því heldur betur upp að hafa farið í tvö atvinnuviðtöl heima á Íslandi og fengið báðar vinnurnar!